Yaz mövsümündə ən çox rast gəlinən problemlər sırasında allergik xəstəliklər xüsusi yer tutur. Bu fəsildə təbiətin oyanması ilə birlikdə allergiyalar da “oyanır”. Əsasən də polen (tozcuq) allergiyası olan insanlar daha çox əziyyət çəkir.
Mövsümi allergiya nəticəsində bədəndə səpgi, gözlərdə qızarma, sulanma, burun axması, çoxsaylı asqırma, qaşınma, öskürək, boğulma və daha təhlükəli olan boğazda şişkinlik və nəfəs darlığı yaranır.
Bəs, görəsən, bunun qarşısını almaq üçün nələr etmək lazımdır?
Mövzu ilə bağlı Bakuplus.az-a açıqlama verən həkim-allerqoloq Şahvələd Məmmədovun sözlərinə görə, allergiyalar iki kateqoriyaya bölünür:
“Uşaqlarda və böyüklərdə fərqi yoxdur. Birinci kateqoriya - allergik dermatozlar - əsasən dəri səpkiləri ilə özünü büruzə verir. Respirator allergiya isə tənəffüs yollarının zədələnməsi ilə müşahidə olunur. Eyni zamanda bronxial astma da yarada bilir.
Yaz aylarında bitki tozcuqları deyilən pollenlərin əmələ gəlməsi ilə fevralın axırı - martın əvvəlindən allergik reaksiyalar yaranmağa başlayır. Pollenlərin tərkibində xüsusi zülallar var. Bu zülallar tənəffüs yolları və ya dəriyə toxunduqda allergik xəstələrdə allergiyaların kəskinləşməsinə səbəb olur. Ona görə bu xəstələr yaz və payız aylarında allerqoloqa müraciət etməlidirlər”.
Allerqoloq qeyd edib ki, qida faktorlarının böyük rolu var:
“Allergiyası olan insanlar, o cümlədən uşaqlarda 3 aylığından atopik dermatit sifətdə səpkilər ilə başlayır. 3 yaşından sonra allergik rinitə asqırmalar da qoşulursa, gələcəkdə ağır fəsadlara - astmaya bənzər xəstəliklərin əmələ gəlməsinə səbəb ola bilər.
Allergik xəstəliklərdə irsiyyətin böyük rolu var. Əgər valideynlərdən birində allergiya varsa, uşaqların bəzilərində müşahidə olunmalıdır. Yox, hər iki valideyndə allergiya varsa, belə uşaqların gələcəyi daha təhlükəlidir. Gələcəkdə həmin atopik dermatit dediyimiz səpkilərə allergik rinit də əlavə olunaraq astmaya çevriləcək. Ona görə də belə uşaqlar zamanında müayinə, poliklinikada allerqoloqların nəzarətində olmalıdır. Kəskinləşmə dövründə isə adekvat müalicələrini almalıdır.
Qida faktorlarının böyük rolu var. Təbii ki, sitrus meyvələri, çərəzlər allergik reaksiyalar yarada bilir. Rusiya alimləri pomidor, acı istiot və bir sıra başqa qidaları da bu siyahıya əlavə edirlər. Lakin Qərbi Avropa alimləri ilkin olaraq çərəzləri allergen kimi götürürlər”.
Nəzrin Vahid
