İçərisində xəstə olmadığı halda "Kəpəz Hospital"a məxsus ambulansla işıqforun qırmızı işığında keçən və bununla da bədbəxt hadisəyə səbəb olan sürücünün məhkəmə prosesi başa çatıb.
Xitab24.az-ın əldə etdiyi məlumata görə, təqsirləndirilən 1991-ci il təvəllüdlü Şahin Mustafayev içərisində xəstə olmayan, sayrışan ışıqları yandırılan 77-JB-277 dövlət qeydiyyat nişanlı "Ford Tranzit" markalı ambulansla səsgücləndirici siqnallardan istifadə edərək işıqforun qırmızı işığında keçib və sol yolda, yaşıl işıqda hərəkət edən mopedi vurub.
Şahin Mustafayev mopedin çoxsaylı xəsarətlər alan sürücüsü 19 yaşlı Xaliv İbrahimovu "Kəpəz Hospital"a çatdırsa da, onun həyatını xilas etmək mümkün olmayıb.
O da məlum olub ki, Binəqədi rayonu ərazisində baş verən hadisə zamanı Şahin Mustafayev yaşayış sahəsində avtomobili 80-90 km sürətlə hərəkət etdirib.
Məhkəmənin hökmü ilə Şahin Mustafayev 5 il 2 ay müddətinə azadlıqdan məhrum edilib.
