12 iyun görkəmli teatr və kino aktyoru, Xalq artisti Hacıbaba Bağırovun doğum günüdür. O, 1932-ci ildə Bakı şəhərində anadan olub.
Hacıbaba Bağırovun atası Ağarza "Passaj" bazarının direktoru olub. Həmçinin uzun illər "Muskomediya"nın inzibatçısı işləyib. Anası Sona xanım isə Cəbrayılın Qumlaq kənindən olan Cəlal bəyin qızıdır.
Müstəqil yaradıcılıq fəaliyyətinə 1950-ci ildə Lənkəran Dövlət Dram Teatrında başlayan Hacıbaba Bağırov 1960-cı ildə Gəncə Dövlət Dram Teatrının aktyor truppasına qəbul olunub, 1962-ci ildən isə Azərbaycan Dövlət Musiqili Komediya Teatrında çalışıb. Hacıbaba Bağırov 1989–1996-cı illərdə özünün təşkil etdiyi Bakı Tənqid-Təbliğ Teatrının bədii rəhbəri işləyib, 1996-cı ildən taleyini yenidən Azərbaycan Dövlət Musiqili Komediya Teatrı ilə bağlayaraq, burada bədii rəhbər və direktor vəzifəsini tutub.
Hacıbaba Bağırov yaradıcılığının Azərbaycan gülüş mədəniyyəti tarixində xüsusi yeri var.
Hacıbaba Bağırovun mədəniyyətimizin inkişafı naminə göstərdiyi xidmətlər yüksək qiymətləndirilib. O, müxtəlif fəxri ad və mükafatlara layiq görülüb, müstəqil Azərbaycan Respublikasının ali mükafatı olan "Şöhrət" ordeni ilə təltif edilib.
Aktyorun həyatında daha bir maraqlı məqam onun Biləcəri deposunda maşinist köməkçisi işləməsidir. O, 1953-cü ildə Azərbaycan Dəmiryol Məktəbini bitirib.
Digər maraqlı məqam ondan ibarətdir ki, sənətkar 5 dəfə rəsmi nikahda olub və bu nikahların üçündən övladı dünyaya gəlib.
Sənətkarın sonuncu evliliyi özündən 37 yaş kiçik olan Arzu xanımla baş tutub. Onun bu evlilikdən Şölə adlı qızı doğulub.
Hacıbaba Bağırov ömrünün dörd-beş ilini dəmir barmaqlıqlar arasında keçirib. Sovet dövründə hərbi xidmətdən qaçan Hacıbaba fərari kimi həbsə məhkum edilib.
Hacıbaba Bağırov uzun illər dostluq etdiyi Siyavuş Aslanla sonradan küsülü olublar. Onların mübahisəsi Musiqili Komediya teatrında direktorluq vəzifəsi üstündə yaranıb. Hacıbaba Bağırov direktor, Siyavuş Aslanın bədii rəhbər təyin olunması münasibətləri gərginləşdirib. Siyavuş Aslan küsərək Akademik Milli Dram Teatrına gedib. Nəsibə Zeynalovanın 75 illik yubileyində hər ikisi gəlib, "Hicran" tamaşasından qısa bir səhnəcik göstəriblər. Burada qismən də olsa barışıblar.
Görkəmli sənətkar 2006-cı il oktyabrın 4-də, 74 yaşında dünyasını dəyişib.
