Bir müddət əvvəl “Zamin Əmlak” şirkəti onlayn platformalar vasitəsilə Bakının müxtəlif ünvanlarında yerləşən mənzillərin satışını elan edib. Evlər bazar qiymətindən çox aşağı məbləğdə təklif edildiyindən insanların marağına səbəb olub. Vətəndaşlar ev almaq məqsədilə ilkin ödəniş olunduqdan sonra notarial qaydada təsdiq olunmuş borc müqavilələri imzalanıb. Bu haqda bu gün, 2 dekabr tarixində Bakuplus.az Real TV-yə istinadən məlumat verir.
Şirkət nümayəndələri ilə danışmaq cəhdi uğurlu alınmadı. Onlar çəkilişdən xəbər tutaraq ofisin arxa qapısından çıxıblar.
Şikayətçilərdən birinin dediklərinə əsasən, şirkətin bir qrup işçisi, hətta daha da irəli gedərək insanların hisslərindən istifadə edib özünü qazi adlandırır. Onlar vətəndaşları ofisə dəvət edir və onları dini şəkillərlə manipulyasiya edərək pullarını mənimsəyirlər.
Aldadılan vətəndaşların 100 minlərlə pulunu mənimsəyən “Zamin Əmlak” şirkətinin təsisçisi Oqtay Zərbəliyev isə ona qarşı irəli sürülən ittihamları qəbul etmir.
Dələduzluq əməli polis tərəfindən araşdırılır. DİN-nin mətbuat xidmətinin KİV və İctimaiyyətlə Əlaqələr Şöbəsinin rəisi Elşad Hacıyev: “Zamin” daşınmaz əmlak şirkətinin əməkdaşları çoxsaylı vətəndaşların güzəştli şərtlərlə mənzil alınmasına kömək göstərilməsi ilə bağlı yalan vəd, eləcə də aldatma yolu ilə müxtəlif məbləğlərdə pul vəsaitlərini ələ keçirmişlər. Cinayət işi üzrə iki nəfər təqsirləndirilən şəxs qismində cəlb edilib. Vətəndaşlara vurulan maddi zərərin ödənilməsi istiqamətində tədbirlər davam etdirilir”.
