Yasamal rayonu, MİDA yaşayış kompleksində yerləşən binadan intihar məqsədilə iki övladı ilə özünü atan qadının cinayət işi Bakı Ağır Cinayətlər Məhkəməsinə göndərilib. Bu haqda bu gün, 2 mart tarixində APA məlumat verib.
Cinayət işinə hakim Novruz Kərimov tərəfindən baxılacaq. 26 yaşlı Aytən Abbasova barəsində “Xüsusi amansızlıqla adam öldürmə” maddəsi ilə ittiham irəli sürülüb.
Hadisə ötən ilin iyul ayında baş verib. Aytən Abbasova övladları - 4 yaşlı Sofiya və 2 yaşlı Sara ilə birgə 5-ci mərtəbədən özünü atıb. Nəticədə Sara dünyasını dəyişib, ana və Sofiya isə ağır xəsarətlərlə xəstəxanaya çatdırılıblar.
Verilən məlumata görə, qayınanası Aytən Abbasova ilə mütəmadi olaraq mübahisə edib.
Hadisə baş verdiyindən bir gün əvvəl gəlinlə qayınana arasında yenidən mübahisə başlayıb. Səs-küyə gələn evin mühafizə işçiləri mənzilin qapısını dəfələrlə döysələr də, heç kim açmayıb.
Aytən Abbasova əvvəllər də intihara cəhd edib. Lakin həmin zaman qadına qonşular mane olublar.
Hadisə ilə bağlı Yasamal Rayon Prokurorluğunda “Özünü öldürmə həddinə çatdırma” maddəsi ilə cinayət işi açılıb. Lakin istintaq zamanı cinayət işinin maddəsi dəyişilib.
