Bakının Binəqədi rayonunda yerləşən Biləcəri istirahət mərkəzinin bir hissəsi restoran tərəfindən zəbt olunub. Bu haqda bu gün, 8 iyul tarixində Bakuplus.az məlumat verir.
Bir neçə gün əvvəl sosial şəbəkələrdə yayılan məlumata əsasən, parkın piyada zolağında gəzməyi qadağan edən lövhə quraşdırılıb. Həmin lövhənin parkda yerləşən restoran tərəfindən quraşdırıldığı bildirilir.
Mövzu xəbər portalları tərəfindən işıqlandırıldıqdan sonra iaşə obyektinin sahibləri bu lövhəni restoranın içərisinə köçürüblər, əvəzində digər baryer quraşdırıblar. Əslində vəziyyət dəyişməyib - parkın yolu hələ də piyadalar üçün əlçatmazdır.
Hüquqşünasların sözlərinə görə, sahibkarlar insanların küçələrdə, parklarda, meşələrdə və digər açıq ərazilərdə sərbəst gəzməsinə qadağa qoya bilməz. Heç bir sahibkara dövlət torpaqlarını zəbt etməyə, insanların sərbəst hərəkətini məhdudlaşdırmağa icazə verilmir.
Müvafiq hüquqpozmalara görə cəzalara gəlincə, qanunvericilik bununla bağlı məsuliyyət nəzərdə tutmur.
Halbuki, Konstitusiyanın 28-ci maddəsində hər kəsin sərbəst hərəkət etmək hüququ nəzərdə tutulur.
[caption id="attachment_51798" align="alignnone" width="800"]
Foto BakuPlus.az[/caption]
