Xəzər Rayon Məhkəməsində qəsdən sağlamlığa az ağır zərər vurmada təqsirləndirilən Xəlil Bəkirovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, sonuncu keçirilən prosesdə hökm oxunub.
Məhkəmənin hökmü ilə Milli Məclisin "Konstitusiya və Suverenlik İli" münasibətilə elan etdiyi amnistiya qərarının müvafiq bəndlərinə əsasən, Xəlil Bəkirov barəsindəki cinayət təqibinə və cinayət işinin icraatına xitam verilib. Onun barəsində seçilmiş başqa yerə getməmək haqqında iltizam qətimkan tədbiri ləğv edilib.
İstintaq materiallarına görə, hadisə 26 may 2025-ci il paytaxtın Xəzər rayonu ərazisində baş verib.
Belə ki, Xəlil Bəkirov keçmiş həyat yoldaşı Səlimə Sayadovanın (adı, soyadı şərtidir) yaşadığı fərdi yaşayış evinə gələrək azyaşlı övladı ilə görüşüb. Daha sonra övladını öz yaşadığı Binə qəsəbəsinə aparmaq istəyən ata ilə buna etiraz edən ana arasında mübahisə yaranıb.
Şəxsi münasibətlər zəminində yaranan münaqişə zamanı təqsirləndirilən şəxs üzərində gəzdirdiyi bıçaqla qəflətən Səliməyə hücum edib. Nəticədə zərərçəkmiş şəxs sifət və sağ əl nahiyələrindən bədən xəsarətləri alıb. Ekspertiza rəyinə əsasən, bu xəsarətlər sağlamlığın uzun müddətə pozulmasına səbəb olan, həyati təhlükəsi olmayan az ağır dərəcəli zərər kimi qiymətləndirilib.
Məhkəmə iclasında Xəlil Bəkirov Cinayət Məcəlləsinin 127.1-ci maddəsi (qəsdən sağlamlığa az ağır zərər vurma) ilə elan olunmuş ittiham üzrə özünü tam təqsirli bilib. O, törətdiyi əməldən səmimi peşman olduğunu deyərək, himayəsində azyaşlı övladının olmasını nəzərə alıb barəsində amnistiya tətbiq edilməsini xahiş edib.
