Ötən həftə ərzində Kliniki Tibbi Mərkəzə dəm qazından zəhərlənmə diaqnozu ilə 17 müraciət daxil olub. Bu haqda AZƏRTAC məlumat verib.
Onlardan 11 nəfər xəstəxanaya yerləşdirilib. Müraciət edənlərin arasında iki azyaşlı uşaq da olub. Dəm qazından zəhərlənmələr qış aylarında xəstəxanaya ən çox müraciət olunan hal kimi qeyd edilir.
Vətəndaşlar nəzərdə tutmalıdırlar ki, dəm qazı iysizdir, hiss olunmur. Dəm qazından zəhərlənmənin əlamətləri: baş ağrısı, baş gicəllənməsi, ürək bulanması, halsızlıq.
Dəm qazından zəhərlənmənin qarşısını almaq üçün sadə qaydalara riayət etmək lazımdır:
- qaz cihazı saz və standartlara uyğun olmalı;
- cihaz olan məkanın hündürlüyü 2 metr 20 santimetrdən az olmamalı;
- havaçəkən sistem işləməli, nəfəslik açıq olmalı;
- hamam otağında ventilyasiya borusu, qapının aşağısında dəliklər olmalı;
- tüstü bacaları ildə iki dəfə təmizlənməlidir.
Qeyri-yaşayış ərazilərinin sahələrində daha bir neçə qaydaya riayət etmək lazımdır:
- Qarajda gecələməyin;
- Qarajda avtomobilin mühərrikini işlək vəziyyətdə saxlamayın;
- Mühərriki işləyən avtomobildə yatmayın.
İlk yardım:
İnsanı təmiz havaya çıxarmaq, dərhal təcili yardım çağırmaq lazımdır.
Həkim gələnə qədər xəsarət alana göstəriləcək yardım:
- Dar paltarlarını soyundurun. Əynindəki paltarın yaxasını, kəmərini və s. açın;
- Əgər huşu özündədirsə, ona isti çay içirin;
- Ağciyər ödeminin qarşısını almaq üçün onu yarı oturaq vəziyyətdə saxlayın;
- Əgər huşsuzdursa, naşatır spirtində isladılmış pambığı burnuna yaxınlaşdırıb iylədin.
Zəruri hallarda təcili yardıma (103) və Fövqəladə Hallar Nazirliyinə (112) zəng etmək tövsiyə olunur.
