Novxanı qəsəbəsi – metronun “Azadlıq” stansiyası marşrutu üzrə hərəkət edən avtobus sərnişinlərin narazılığına səbəb olub. Bu haqda bu gün, 3 avqust tarixində Bakuplus.az ATV-yə istinadən xəbər verir.
Sakinlərin sözlərinə görə, onlar hər səhər 123 nömrəli avtobusları uzun müddət gözləməli olurlar. Eləcə də sözügedən marşrutla hərəkət edən avtobuslar köhnə vəziyyətdədir və sərnişinlər üçün narahatlıq yaradır.
“Avtobusların gec gəlməyinə görə işə gecikirik, əziyyətlə çatırıq. Təyin olunan vaxtda gəlməlidir, lakin elə olur ki 1 saat gec gəlir”, – deyə sakinlər şikayət edirlər.
123 saylı avtobusun sürücüsü və dispetçeri isə bildiriblər ki, avtobusların gec işləməsinin səbəbi yollarda olan tıxaclardır.
“Elə olur ki, 20-25 dəqiqə tıxacda qalırıq. İnterval isə 15-17 dəqiqədir. Hazırda xətdə 7 avtobus var”, – deyə sürücü bildirib.
Həmin xəttə cavabdeh olan şəxsdən verilən məlumata görə, avtobus xətti yaxın vaxtlarda müsabiqəyə çıxarılacaq.
Yerüstü Nəqliyyat Agentliyindən isə bildirildi ki, marşrut şəbəkəsinin optimallaşdırılması işləri çərçivəsində 123 saylı marşrut xətti müsabiqəyə təqdim edilib.
