Nəsimi rayonu, 28 May küçəsində yol cizgiləri sürücüləri çaş-baş qoyub. Bu haqda bu gün, 25 aprel tarixində Bakuplus.az ATV-yə istinadən xəbər verir.
Sözügedən ərazidə əvvəl avtomobillər 2 istiqamətdə hərəkət ediblər, daha sonra isə oranın istiqamətində dəyişikliklər olub və yol birtərəfli olub. Buna baxmayaraq, yolda köhnə cizgilər qalıb. Bu da sürücüləri çaşdırır.
“Elə sürücü olur, hələ də o istiqamətdə gəlir. Çaşır”, – deyə sürücülər bildirirlər.
Nəqliyyat məsələləri üzrə ekspert Ərşad Hüseynovun sözlərinə görə, asfalt örtüyündən nişanları siləndə yol örtüyünün zədələnməsi qaçılmazdır.
Yerüstü Nəqliyyat Agentliyindən bildirildi ki, yaxın vaxtlarda ərazidə əsaslı təmir və yenidənqurma işlərinə start veriləcək. Həmin zaman bütün dəyişikliklər həyata keçiriləcək.
