Ötən gün media və sosial şəbəkələrdə Bakıdakı 6 nömrəli məktəb-liseydə 2-ci sinif şagirdinin zorakılığa məruz qalması ilə bağlı yayılan məlumatlarla bağlı araşdırma aparılıb. Bu haqda bu gün, 23 yanvar tarixində Bakuplus.az Məktəbəqədər və Ümumi Təhsil üzrə Dövlət Agentliyinə istinadən məlumat verir.
Açıqlamada bildirilir ki, yanvarın 10-da məktəbə daxil olmuş məlumat əsasında valideynlərin iştirakı ilə təhsil müəssisəsində müşahidə kameralarından görüntülərə baxılıb. Məlumatda səsləndirilən fikirlər videogörüntülərdə öz təsdiqini tapmayıb.
Açıqlamada o da qeyd edilib ki, məktəbin psixoloqları ümumilikdə siniflə, Səbail rayon Polis İdarəsinin əməkdaşları isə valideynlərin iştirakı ilə hər bir şagirdlə ayrılıqda söhbət aparıblar. Məktəb rəhbərliyi və prosesə cəlb olunmuş aidiyyəti orqanlar tərəfindən mövcud qaydalar çərçivəsində lazımi tədbirlər görülüb.
Daha öncə sosial şəbəkələrdə 2-ci sinif şagirdinin 7-ci sinif şagirdləri tərəfindən dəfələrlə seksual hərəkətlərə təhrik edildiyi iddia edilib. Uşağın anasına istinad edərək bildirilib ki, onun psixoloji vəziyyəti ağırdır.
