Paytaxtın Yeni Yasamal qəsəbəsindən M.F.Axundov bağına gedən 77 nömrəli marşrut avtobusun sürücüləri qaydaları pozurlar. Bu haqda bu gün, 22 sentyabr tarixində Bakuplus.az Sfera.az-a istinadən xəbər verir.
Verilən məlumata görə, bu marşrutdan istifadə edən vətəndaşlar yaranmış vəziyyətlə bağlı daşıyıcıya dəfələrlə şikayət ediblər. Sürücülər istər uşaq, istər yaşlılar avtobusa minən zaman qapıları tez bağlayırlar və sərnişinlər qapıların aralarında qalırlar.
Sərnişinlər bildirirlər ki, bir neçə gün əvvəl 4-5 yaşlarında uşağın ayağı qapının arasında qalıb. Buna məhəl qoymayan sürücü hərəkətə davam edib. Vətəndaşlar avtobusun qapılarını açsın deyə ona qışqırsalar da, sürücü bunu nəzərə almayıb. Şikayətçilərin dediyinə görə, bu hallarla tez-tez rastlaşırlar.
Həmçinin sərnişinlər deyirlər ki, avtobus uzun intervalla işləyir. Bəzi günlər onlar pik saatlarda avtobusu dayanacaqda 40 dəqiqə gözləyiblər.
“Hətta dəfələrlə sürücülərin öz aralarındakı telefon zənglərində “planı tam doldurmamışam, dayanacaqlarda ləngi” demələrinə də şahid olmuşuq. Heç günün ən pik saatlarında digər marşrutlar üzrə hərəkət edən avtobuslar (14, 17) belə bu qədər gecikmir. Sürücülərə, dispetçerlərə irad bildirəndə isə ya kobudca “bəyənmirsən, taksiyə min” deyirlər, ya da heç saymırlar”, – deyə vətəndaşlar bildiriblər.
Məsələ ilə bağlı Rəqəmsal İnkişaf və Nəqliyyat Nazirliyinə müraciət edilib. Nazirlik rəsmisi müraciətin əsasında şikayətlərlə bağlı araşdırma aparılacağını bildirib.
