8 Noyabr prospekti günlərdir qazılıb, amma təmir işləri aparılmır. Bu haqda 19 fevral tarixində Qafqazinfo.az məlumat verib.
Xəzər rayonu, 8 Noyabr prospekti bir həftədən artıqdır ki, bir neçə yerdən qazılıb və yolun bu vəziyyətdə olması ilə bağlı heç bir xəbərdaredici işarə qoyulmayıb. Aeroport yolundan yüksək sürətlə gələnlər qəfildən çuxura düşürlər. Əsas da gecə saatlarında bu yoldan istifadə edənlər üçün ciddi təhlükə yaranır. Bu səbəbdən Zığ istiqamətindən üzü mərkəzə doğru hərəkət edən sürücülər yolun vəziyyətindən çətinlik çəkirlər.
Sürücülərin sözlərinə görə, hazırda yolda təmir işləri dayandırılıb və nə vaxt bitəcəyi, yolların nə zaman düzələcəyi məlum deyil.
“Bu məsələ nəzarətimizdədir. Rəhbərlik tərəfindən tapşırıq verilib ki, qısa müddət ərzində ərazidə narahatlığa səbəb olan problem aradan qaldırılsın”, - məsələ ilə bağlı Avtomobil Yolları Dövlət Agentliyi açıqlama verib.
