Bakının Xəzər rayonu, Şağan qəsəbəsi, Heybətqulu Məmmədbəyli küçəsində sakinlər gölməlçələrdən əziyyət çəkirlər. Bu haqda bu gün, 9 yanvar tarixində Bakuplus.az Qafqazinfo-ya istinadən xəbər verir.
Sakinlərin sözlərinə görə, onlar 4 ildir baş verən subasmalara görə əziyyət çəkirlər.
“Sözügedən ərazidə kanalizasiya xəttinin düzgün işləməməsi nəticəsində yollar pis vəziyyətdədir. Məktəblilər gedib-gələ bilmirlər. Təxminən 100 metr ərazi belədir”, – deyə sakinlər şikayət edirlər.
Xəzər Rayon İcra Hakimiyyətindən bildirilib ki, yağış sularının axması üçün lazımi infrastruktur var, lakin su normadan çox olduğu üçün problemlər yaranır.
“Azərsu” ASC-nin mətbuat xidmətinin rəhbəri Anar Cəbrayıllı isə qeyd edib ki, Şağan qəsəbəsi ərazisində kanalizasiya şəbəkəsinin inşası nəzərdə tutulub və işlər mərhələli şəkildə həyata keçiriləcək.
