Yasamal rayonu, Alatava yaşayış massivində psixoloji problemləri olan xəstə sakinləri narahat edir. Bu haqda bu gün, 28 fevral tarixində Bakuplus.az ARB-yə istinadən xəbər verir.
Qonşuların sözlərinə görə, Ümid Əhmədov şizofreniya xəstəsidir. O, son bir neçə həftədir dərmanlarını qəbul etmədiyinə görə təhlükə yaratmağa başlayıb.
“Heç kimə tabe olmur. Hər şeyi, bütün əşyalarını yandırır. Biz də qorxuruq ki, alov bizim evlərə də keçər. Artıq qapını açmağa da qorxuruq. Gecə saat 3-4-də qapıları döyür. Keçən dəfə bacısının barmağını da qoparıb”, – deyə qonşular bildirirlər.
Ümidin yaşadığı yer antisanitariya vəziyyətindədir. Heç bir gəliri yoxdur. Qonşuların gətirdikləri yeməklərlə qidalanır.
Ümidin bibisi Tamilla Baxşəliyeva bildirib ki, Ümid bir müddət onunla qalıb, sonra yenidən öz evinə qayıtmaq istəyib:
“Ümid Əhmədov və Ümidə Əhmədova əkizdirlər. Doğuş vaxtı travma alıblar. Anası epilepsiya olmuşdu, atası isə əsgərlikdən gələndən sonra psixologiyası korlanmışdı. Hamısı qeydiyyatdadır. Ümid dərmanları atanda yaxşılaşır, atmayanda pis olur. Şəxsiyyət vərəqəsi yoxdur, onu da yandırıb. “DOST” Mərkəzinə zəng edərək dedim: “Xəstə uşaqdır, bunun pensiyası niyə verilmir?” Dedilər: “88 nömrəli forma gətirin, ona görə verilmir”, – deyə o qeyd edib.
Onun sözlərinə görə, xəstəxanalar da məsələni həll etmirlər.
