Bakıda kişinin həyat yoldaşı və 3 uşağına şiddət göstərdiyi görüntülər yayılıb. Bu haqda bu gün, 20 fevral tarixində Bakuplus.az Azərbaycan Uşaqlar Birliyinin rəhbəri Kəmalə Ağazadəyə istinadən məlumat verir.
Azərbaycan Uşaqlar Birliyinin sədri Kəmalə Ağazadə sözügedən video ilə bağlı açıqlama verib. Onun sözlərinə görə, görüntülər bir müddət əvvəl çəkilib.
“Şiddət görən ana digər övladlarını qorumaq üçün bu görüntüləri çəkib. Qadın və üç qızı atasının evinə getsələr də, onların həyatları təhlükə altındadır. Qadının bir istəyi var ki, boşansın və qanun çərçivəsində aliment təyin edilsin”, – deyə Ağazadə qeyd edib.
O, həmçinin bildirib ki, aidiyyəti qurumlar məsələni nəzarətə götürməlidir.
“Bakı Şəhəri Xəzər Rayon İcra Hakimiyyəti qadına mühafizə orderinin verilməsində dəstək olmalıdır. Vəkillər Kollegiyasından xahiş edirəm ki, ödənişsiz vəkillə təmin edilməsində kömək olsunlar. Əmək və Əhalinin Sosial Müdafiəsi Nazirliyinin Sosial Xidmətlər Agentliyi xidmət paketlərini ailəyə təqdim etməlidir. Bu ailədə 15 yaşında qız var. Bu il 9-cu sinfi bitirəcək. Təhsilini davam etdirmək istəsə də, atası ərə vermək niyyətindədir”.
Daxili İşlər Nazirliyindən bildirilib ki, qurum görüntülərdən məlumatlıdır. Bununla bağlı ötən həftənin cümə günü məlumat daxil olub və araşdırmalara başlanıb.
