Ölkədə MTK-lardan yalnız elektron platforma vasitəsilə mənzil satılması planlaşdırılır. Bu haqda bu gün, 29 mart tarixində Bakuplus.az ATV News-a istinadən xəbər verir.
Yeniliyə görə, mənzili alan şəxsin bütün prosesləri vahid elektron sistem üzərindən həyata keçiriləcək.
Yeni sistem daxil olandan sonra yeni tikilmiş binadan mənzil alan vətəndaş onun istismarına icazə verilib-verilmədiyini öyrəcənək. Həmçinin elektron portaldan kənar hər hansı mənzil satışı mümkün olmayacaq. Əlavə olaraq, mənzilin alınacağı tikinti şirkəti barəsində bütün məlumatları görmək mümkün olacaq.
Ekspert Elnur Fərzəliyevin sözlərinə əsasən, tikinti şirkətindən mənzil alan şəxslər elektron platformada həmin mənzilin sahibinin olub-olmaması və yaxud həmin mənzilin tikinti şirkətinə məxsus olması ilə bağlı məlumat əldə edəcəklər. Alqı-satqı baş tutduqdan sonra vətəndaşın adı həmin elektron platformada göstəriləcək.
Bir zamanlar bəzi tikinti şirkətlərinin eyni mənzili bir neçə nəfərə satması ilə bağlı vətəndaşlar ciddi problemlərlə üzləşirdilər. Yeni qaydalardan sonra bu problem aradan qalxacaq.
“Tikinti şirkətləri vətəndaşlara mənzil satarkən müqavilədə 100 kv.m göstərilsə də, bəzi hallarda həmin mənzillərə çıxarış alanda ortalama 10-15 faiz daha az hissə göstərilir. Həmin platformada isə mənzillərin hansı ümumi sahəsi olacağı qeyd olunacaq”, – deyə ekspert əlavə edib.
Ekspert hesab edir ki, bu sahənin elektronlaşması nəinki yerli alıcıların, hətta xarici ölkələrdən də investorların ölkəyə daşınmaz əmlak bazarına cəlb olunmasına səbəb ola bilər.
