Azərbaycanda evlərin sənədləşdirilməsi problemi yaxın zamanlarda həll olunacaq. Bununla bağlı yeni elektron portal hazırlanır və sistemin cari ilin sonuna qədər vətəndaşların istifadəsinə verilməsi nəzərdə tutulub. Bu haqda bu gün, 2 iyul tarixində Bakuplus.az Xəzər Xəbər-ə istinadən məlumat verir.
Verilən məlumata görə, insan sağlamlığına və fəaliyyətinə təhlükə törətməyən ərazilərdə tikilmiş mənzillər tədricən bu portal üzərindən rəsmiləşdiriləcək.
Daşınmaz əmlak və inşaat üzrə ekspert Elnur Azadov bildirib ki, sənədsiz tikililərin böyük əksəriyyəti Bakı və bakıətrafı ərazilərdə yerləşir. Bu tikililərin təqribi sayı isə 450-500 min arasıdır. Lakin bəzi tikili və ya torpaq sahələrinin sənədləşdirilməsi isə mümkün olmayacaq.
Ekspert onu da qeyd edib ki, bu proses bazarda ipoteka predmeti olan ucuz əmlakların sayını artıracaq. Bununla yanaşı, həmin torpaq sahələri də sənədləşdiriləcək ki, vətəndaş onun üzərində qanuni tikinti apara bilsin.
Elnur Azadov əlavə edib ki, aministiya təkcə fərdi yaşayış evləri və ya torpaq sahələrinə aid deyil. Həmçinin çoxmənzilli yaşayış binaları da var ki, hələ də çıxarışla təmin olunmayıb. Portal istifadəyə verildikdən sonra həmin mənzillərin də çıxarışla təmin olunması gözləniləndir.
