Bakıda binalara mərkəzi istiliyin verilmə vaxtı açıqlanıb. Bu barədə 5 oktyabr tarixində Trend.az saytı məlumat verib.
"Azəristiliktəchizat" ASC Bakıda mərkəzi istilik sistemlərinin yoxlanılmasına başlayıb. Qurumun rəsmisi Rafiq Əliyevin sözlərinə əsasən, rayonlar üzrə müxtəlif vaxtlarda sistemlərə soyuq su veriləcək. Bakıda noyabrın 15-dən binalara mərkəzi istiliyin verilməsi başlanacaq.
Həmçinin bu ildən “Azəristiliktəchizat” ASC yaranmış aylıq borclarla bağlı, qəza və təmir işləri ilə əlaqədar, məhdudiyyətlər haqqında SMS vasitəsilə abonentlərə bildirişlər göndəriləcək.
Qeyd edək ki, "Azəristiliktəchizat" ASC-yə məxsus 550 qazanxana istismar edilməklə 3800 yaşayış binası, mənzil, 291 məktəb, 150 uşaq bağçası, 159 səhiyyə, 112 büdcədən maliyyələşdirilən digər sosial obyekt və 1188 təsərrüfat obyekti istiliklə təmin edilir.
