Suraxanı rayonunda içməli sudan qanunsuz istifadə halları aşkarlanıb. Bu haqda bu gün, 2 iyun tarixində Bakuplus.az “Azərsu”ya istinadən xəbər verir.
Yeni Günəşli qəsəbəsi, A-B massivində yerləşən ət kəsimi məntəqəsinin sahibi müqavilə bağlamadan sudan istifadə edib. Obyekt sahibinə xəbərdarlıq edilsə də, o, suyu talamaqda davam edib.
Bülbülə qəsəbəsi, Nəriman Nərimanov küçəsində qum bazarı və istixanada sudan sayğacdankənar istifadə halları aşkarlanıb.
Sudan qanunsuz istifadə Hövsan qəsəbəsi, Elman Qasımov küçəsi, 20 ünvanında yerləşən kafedə də aşkarlanıb. Kafe sahibi obyekti çən vasitəsilə su ilə təmin etdiyini bildirsə də, məlum olub ki, yaxınlıqdan keçən şəbəkədən həm çənə, həm də obyektin özünə qanunsuz su xətti çəkilib.
Oqtay Şabanov küçəsində yerləşən toyuq və balıq məhsullarının qurudulması sexində də su sayğacının olmasına baxmayaraq, sayğacdankənar xətdən istifadə edildiyi aşkarlanıb.
Aşkar olunan qanunsuzluqlar aradan qaldırılıb. Məsul şəxslər cəzalandırılıblar. Araşdırmalar davam edir.
Suraxanı rayonunda cari ilin yanvar-aprel aylarında sudan qanunsuz istifadə ilə bağlı 133 fakt aşkarlanıb, 50-dən çox fakt hüquq-mühafizə orqanlarına göndərilib.
