Sakinlər “AzParking”in yaratdığı problemlərdən şikayətçidirlər. Bu haqda bu gün, 26 mart tarixində Bakuplus.az İctimai TV-yə istinadən xəbər verir.
Paytaxt ərazisində fəaliyyət sahəsini genişləndirən “AzParking” ödənişli parklanma xidməti səbəbindən sürücülər avtomobillərini ödənişsiz park etmək üçün alternativ yerlər axtarırlar. Bu səbəbdən də piyada səkiləri və məhəllədaxili yollar avtomobillərlə dolub-daşır.
“Çox təhlükəlidir. Uşaqları tək qoya bilmirik. Səkilərin hamısı zəbt olunub. Maşınların səsindən narahat oluruq”, – deyə sakinlər bildirirlər.
Milli Məclisdə də məsələ ilə bağlı müzakirələr aparılıb:
“Biz sürücüləri görünən yerdən qovmuşuq. Ancaq məhəllə daxilində xaos yaranıb. Elə bil zibili yığışdırıb harasa gizlətmişik”, – deyə millət vəkili Naqif Həmzəyev qeyd edib.
Ekspertlər isə parklanmaya görə cəzaların sərtləşdirilməsinin və qanundakı boşluqların nəzərdən keçirilməli olduğunu qeyd edirlər.
