Sabunçu rayonu ərazisində yerləşən Bülbülə gölünə məişət tullantılarının atılması nəticəsində göldə və ətrafda antisanitar vəziyyət hökm sürür. Bu haqda bu gün, 23 oktyabr tarixində Bakuplus.az Xəzər Xəbər-ə istinadən məlumat verir.
Gölün baxımsızlığı uzun müddətdir ki, yaxınlıqda yaşayan sakinləri narahat edir. Yerlilər iddia edirlər ki, gecə saatlarında yük maşınları buraya zibil tökürlər.
Sakinlər iddia edirlər ki, onlar dəfələrlə əraziyə gələn zibildaşıyan maşınlarının qarşısını kəsiblər. Onlar gölməçənin ətrafına zibil səpilməsinə imkan verməyiblər.
Bununla bağlı Sabunçu rayon İcra Hakimiyyətindən məlumat verilib ki, iri yük maşınları gölün ətrafına zibil tökür və nəticədə bu vəziyyət yaranır. Həyata keçirilən tədbirlər nəticəsində təkcə ötən gecə iki belə fakt aşkarlanıb.
“Qeyd olunan yer bir neçə dəfə təmizlənsə də, bəzi hallarda tullantıların atılması təkrarlanır. "Bakı Abadlıq Xidməti" MMC tərəfindən həmin ərazidə abadlıq işləri aparıldığından yük avtomobillərinin yaxınlaşmasının qarşısının alınması məqsədilə süni maneələrin yaradılması mümkün deyil. Yaranmış problemin həlli ilə bağlı Rayon Mənzil-Kommunal Təsərrüfatı Birliyi tərəfindən təmizlik işlərinə başlanılıb. Qeyd olunan sahə Bakıxanov qəsəbəsi inzibati ərazi dairəsi üzrə nümayəndəliyi və Rayon Polis İdarəsinin yerli struktur bölməsi tərəfindən daimi nəzarətə götürülüb”, – məlumatda deyilir.
Azərsu "ASC-dən bildirilib ki, qurumun ərazidə heç bir infrastrukturu yoxdur, bu səbəbdən yük maşınlarına qarşı süni maneələrin yaradılması mümkün deyil.
“Master planına əsasən, gölün ətrafında kollektor tikiləcək və bura axıdılan tullantı sularının qarşısı alınacaq”, - deyə onlar əlavə ediblər.
