Bakının Səbail rayonunun Badamdar qəsəbəsinin sakinləri yolsuzluq problemi ilə üzləşiblər. Bu haqda bu gün, 27 yanvar tarixində Bakuplus.az Caliber.az-a istinadən məlumat verir.
“Badamdar qəsəbəsinin 3-cü massivində “Azərsu” Açıq Səhmdar Cəmiyyəti tərəfindən boru dəyişmə işləri keçirilib. Bu işlərin nəticəsində yollarımız istifadəyə yararsız hala düşüb. Əsasən, 50 və 52 saylı küçələrin vəziyyəti acınacaqlıdır.
Qış aylarında uşaqlarımız məktəbə gedəndə palçıqlı yollardan keçməli olurlar. Dərslərə palçığa batmış paltar və ayaqqabı ilə gedirlər. Bu vəziyyət artıq 5 aydır ki, yaşanır”, - sakinlər mövcud vəziyyətin acınacaqlı olduğunu deyirlər.
“Azərsu”dan bildirilib ki, podratçı şirkət asfalt çəkmək üçün havanın normallaşmasını gözləyir. Havalar yağıntılı olduğuna görə asfalt çəkmək mümkün deyil.
“İş keyfiyyətli olsun deyə yer qurumalıdır. İndi asfalt çəkmək mümkün deyil. Yalnız torpaq quruduqdan sonra asfalt çəkilə bilər. Havalar imkan versə, gələn həftədən asfalt çəkilişinə başlanacaq”, - qurumun rəsmisi Anar Cəbrayıllı bildirib.
[caption id="attachment_127739" align="alignnone" width="640"]
Foto Caliber.az[/caption]
