Səbail rayonu, Badamdar qəsəbəsinin 3-cü massivində bir müddət əvvəl su və kanalizasiya xətləri çəkilib. Lakin aparılan işlərdən sonra sakinlər asfaltsız qalıb. Bu haqda bu gün, 20 sentyabr tarixində Bakuplus.az Bakı Gündəliyi Facebook səhifəsinə istinadən məlumat verir.
“Azərsu” ASC-nin işçiləri tərəfindən aparılan işlərdən sonra asfalt örtüyü yenilənməyib. Bu səbəbdən həm piyadalar, həm də ictimai və fərdi nəqliyyat vasitələri hər gün çətinlik çəkir.
Sakinlərin müraciətinə Azərbaycan Avtomobil Yolları Dövlət Agentliyindən bildirilib ki, yolların asfalt örtüyünü “Azərsu” yeniləməlidir.
Səbail Rayon İcra Hakimiyyətindən və “Azərsu” ASC-dən isə bildirilib ki, məsələ araşdırılacaq və müvafiq tədbirlər görüləcək.
