Son günlər Badamdarın üzü Bayıl istiqamətinə gedən yolun mərkəzində maneələr quraşdırılır, yolun mərkəzində asfalt qatına torpaq və daşlar tökülür. Nəticədə piyada və sürücülərin yolu kəsilir. Yolu keçməyə cəhd edən sürücülərin nəqliyyat vasitələrinə ciddi ziyan dəyir. Bu haqda bu gün, 31 avqust tarixində Bakuplus.az ATV Xəbər-ə istinadən məlumat verir.
Yaxınlıqda yaşayanların sözlərinə görə, yol həftənin müəyyən günləri, kim olduğunu bilmədikləri şəxslər tərəfindən bağlanır və bir müddət sonra açılır. Sürücülər yolun başlanğıcından etibarən hərəkət etməyə başlayanda hər dəfə “İnşallah yolun ortasında maneə ilə rastlaşmarıq” deyirlər.
Ərazi sürüşməyə meyilli olduğundan Fövqəladə Hallar Nazirliyinin (FHN) əməkdaşları bir müddət əvvəl burada bərkidilmə işləri aparıblar. Sonra ərazi sürücülərin və piyadaların istifadəsinə verilib. Amma son vaxtlar mülki geyimli şəxslər yolu səbəb göstərmədən bağlayırlar.
Səbail rayon İcra Hakimiyyətindən bildirildi ki, ərazidə FHN-in əməkdaşları iş aparırlar, yol da bu səbəbdən bağlanır.
FHN-dən isə bildirildi ki, baş verənlərlə nazirliyin heç bir əlaqəsi yoxdur. Sürüşmə ilə bağlı işlər bir müddət əvvəl yekunlaşıb.
