Bakıda, Sabunçu rayon polis bölmələrindən birinin qarşısında ailəsi tərəfindən fiziki zorakılığa məruz qalan azyaşlı uşaq aşkar olunub. Bu haqda bu gün, 31 oktyabr tarixində Bakuplus.az Azərbaycan Uşaqlar Birliyinin rəhbəri Kəmalə Ağazadəyə istinadən məlumat verir.
Onun sözlərinə görə, polis idarəsinin qarşısından buraxılan 6 yaşlı uşaq sığınacağa yerləşdirilib və onun reabilitasiyasına başlanılıb:
“Uşağın dediyinə görə, Sabirabadda yaşayıblar. Ora isə Naxçıvandan gəliblər. Həm də deyir ki, Bakıxanov qəsəbəsində kirayədə qalırdılar. Dediyinə görə, özündən başqa, iki bacısı və bir qardaşı da var. Ehtimal edirik ki, anası narkotik istifadəçisidir. Yetərincə fiziki şiddət görüb. Uşaq bildirib ki, onu evdə “bicbala” deyib döyürmüşlər.
Hazırda Sabunçu rayon Polis Şöbəsi tərəfindən araşdırma gedir. Ailəsinin axtarışı ilə bağlı nəticəni gözləyirəm”.
Kəmalə Ağazadə əlavə edib ki, uşaq 3 gündür sığınacaqdadır və adaptasiyası yaxşı gedir.
