Paytaxt ərazisində qeyri-adi oğurluq hadisəsi baş verib. Bu haqda bu gün, 6 iyul tarixində Bakuplus.az Qafqazinfo-ya istinadən xəbər verir.
Sosial şəbəkə istifadəçisi N.Ağaverdiyev paylaşımında yaşadığı məhəllədə naməlum şəxslərin avtomobil nömrələrini oğurladıqlarını, əvəzində Rusiyaya məxsus WhatsApp nömrələrini orada qoyub getdiklərini bildirib.
N.Ağaverdiyev nömrə ilə əlaqə saxlayıb və ona bildirilib ki, həmin şəxs Rusiyada yaşayır və məsələdən xəbəri yoxdur. Ardınca şikayətçi hüquq-mühafizə orqanlarına müraciət edib. Daha sonra həmin şəxslər nömrəni gətirərək polisə təhvil veriblər.
Digər sosial şəbəkə istifadəçiləri isə qeyd ediblər ki, bu hallar son vaxtlar tez-tez baş verir. Əksər hallarda avtomobil nömrələri tapılmır və oğurlayan şəxslər pul müqabilində maşın nömrəsinin yerini deyirlər.
Daxili İşlər Nazirliyinin (DİN) mətbuat xidmətinin baş inspektoru, polis leytenantı Elbrus İbrahimovun sözlərinə görə, hadisə ilə bağlı araşdırma aparılır.
