6-10 oktyabr tarixlərində Bakı Ekspo Mərkəzində Nizami Gəncəvinin 880 illik yubileyinə həsr olunacaq "Baku International Book Fair 2021" - 7-ci Bakı Beynəlxalq Kitab Sərgisi keçiriləcək.
Tədbir Azərbaycan Mədəniyyət Nazirliyinin təşkilatçılığı və BP Azərbaycan şirkətinin dəstəyi ilə həyata keçiriləcək.
Sərgidə Azərbaycan, Bolqarıstan, Gürcüstan, Fransa, İndoneziya, İran, Kolumbiya, Qazaxıstan, Qırğızıstan, Misir, Özbəkistan, Rusiya və Türkiyəyə məxsus ümumilikdə 13 ölkədən 165 nəşriyyat evi, mətbəə, kitab mağazası və mədəniyyət mərkəzləri iştirak edəcək.
Sərgi-yarmarka iştirakçıları təşkilatçılar tərəfindən 6 kvadratmetrə qədər ekspozisiya sahəsi və lazımi avadanlıqlarla ödənişsiz təmin ediləcək.
"Nizami Gəncəvi İli" çərçivəsində hər gün səhər saat 10:00-dan etibarən Bakı Ekspo Mərkəzinin foyesində müxtəlif tədbirlər keçiriləcək. Uşaqlar üçün bir sıra tədbirlər təşkil olunacaq. Sərgi zamanı "Tık-Tık xanım", “Cırtdan” uşaq tamaşası, uşaqlar və böyüklər üçün müxtəlif master-klasslar nümayiş olunacaq.
Sərginin məqsədi kitab və mütaliəni təbliğ edərək populyarlaşdırmaq, ziyarətçiləri həm Azərbaycan, həm də xarici nəşriyyatların çap məhsulları ilə tanış etməkdən əlavə nəşriyyat işinə dəstək vermək və eləcə də rəqəmsal dövrdə kitab biznesinin inkişafı ilə bağlı fikir mübadiləsini təmin etməkdir.
Sərgi-yarmarkaya iştirakçı və ya ziyarətçi qismində qatılmaq istəyənlər qeydiyyatdan keçmək və yaxud telefon vasitəsilə müraciət edə bilərlər.
Əlaqə nömrəsi: +99412 404 10 00
