Bakıda binaların rənglənməsi ilə bağlı açıqlama verilib. Bu haqda bu gün, 15 iyun tarixində Bakuplus.az Report-a istinadən xəbər verir.
Son günlər Bakıda aqlay daşlı binaların rənglənməsinə dair paylaşılan foto və videolar sosial şəbəkələrdə narazılıq yaradıb.
Məsələ ilə bağlı Bakı Abadlıq Xidmətindən bildirilib ki, COP29 ilə əlaqədar tarixi əhəmiyyətli binalar, memarlıq abidələri abadlaşdırılır:
“Təqdim edilən fotolardan aşkar şəkildə görünür ki, ağ rəngdə olan hissə boya yox, astardır. Tarixi bina olsa da, onun üzərində emulsiya işlənən yerlər var. Məhz həmin hissələr hazırda yenilənir. Astar vurulduqdan sonra ora kosmetik olaraq uyğun rəng tətbiq ediləcək”, – deyə qurumdan qeyd edilib.
Elmlər doktoru, tanınmış memar Elçin Əliyev çəkilən maddənin boya üçün hazırlıq qatı olduğunu təsdiq edib:
“Bu, sadəcə rəngin daha möhkəm olması üçün hazırlıqdır. Biz ölkəmizə düşmən deyilik ki, binaları rəngləyərək şəhərimizin gözəlliyini pozacaq addım ataq”, – deyə o əlavə edib.
