Avgustun 31-də Bakı Konqres Mərkəzində “CAVAN Cosplay&Gaming” festivalı keçiriləcək. Bu haqda bu gün, 18 iyul tarixində Bakuplus.az xəbər verir.
Tədbirdə kiberidman turnirlərində iştirak, sevimli personajınızın obrazında səhnədə çıxış etmək, həmçinin stolüstü oyunlar oynamaq, VR dünyasına qərq olmaq və PvP-də bir çox hədiyyələr qazanmaq mümkündür.
Asiya mədəniyyətini sevənlər üçün festivalda yarmarka, fiqurlar və Koreya küçə yeməkləri olan ayrıca zal olacaq. Uşaqlar üçün isə xüsusi bir zal ayrılaraq, orada animatorlar, cürbəcür oyunlar və rəsm yerləri təşkil olunacaq.
Eləcə də tədbirdə iki yemək meydançası olacaq.
Proqramın sonunda isə rok qruplarının çıxışları və DJ ilə diskoteka baş tutacaq.
Biletlər artıq iTicket saytında və mərkəzin kassalarında satışdadır və 15-100 manat arasında dəyişir.
Festivalın proqramı:
11:00 - Qapıların açılması
12:00 - Zalda tədbirin möhtəşəm açılışı (rəqslər ilə)
12:15 - Tamaşa (“Harry Potter”)
13:00 - “Solo Cosplay Show” yarışması
14:00 - Spikerlərin çıxışı
15:00 - “Group Cosplay Show” yarışması
15:30 - K-pop müsabiqəsi
16:15 - Avtoqraf sessiyası
17:00 - Kiberidman yarışlarının final mərhələləri
17:45 - Qaliblərin mükafatlandırılması
18:15 - Bağlanış mərasimi
19:00 - After party.
