Binəqədi rayonu, Rəsulzadə qəsəbəsində daşdan tikilmiş avtobus dayanacağı düz işıqforun qarşısında yerləşir. Ancaq avtobus sürücüləri nəqliyyat vasitələrini saxladığından digər sürücülərə çətinlik yaranır. Bu haqda bu gün, 7 dekabr tarixində Bakuplus.az ATV-yə istinadən məlumat verir.
Daş dayanacaqdan təxminən 50-100 metrlik məsafədə yeni dayanacaq quraşdırılıb. Lakin burada nə avtobus sürücüləri nəqliyyat vasitələrini saxlayırlar, nə də ki sərnişinlər burada dayanırlar. Sərnişinlər bildirirlər ki, avtobuslar yeni dayanacaqda saxlamadığına görə onlar köhnə dayanacaqda gözləməli olurlar.
Paytaxtda dayanacaqla bağlı başqa problem də var. Bəzi ərazilərdə avtobus duracaqlarını göstərən nişanlar var, amma pavilyon yoxdur. Belə olan halda sərnişinlər yağışlı havalarda əziyyət çəkirlər.
Məsələ ilə bağlı BNA-nın Yol hərəkəti təşkili şöbəsinin müdiri Tərlan Səfərov bildirdi ki, 15 ilin dayanacaqları hesab edilən daş dayanacaqlarla bağlı artıq monitorinqlər aparılıb, siyahılar tutulub: “Əraziyə əməkdaşlar tərəfindən baxış keçiriləcək, problemlər müəyyən ediləcək. Və əgər problem həqiqətən də dayanacağın yerləşmə yeridirsə, o zaman onu köçürmək üçün tədbir görəcəyik”.
Pavilyonu olmayan dayanacaqlar haqqında isə qurum rəsmisi bildirdi ki, hər il şəhər ərazisində təxminən 100 pavilyon quraşdırılır. Gələn ildən yeni pavilyonların quraşdırılması nəzərdə tutulub.
[caption id="attachment_82115" align="alignnone" width="640"]
Foto ATV-nin rəsmi Youtube kanalı[/caption]
