“Red Bull Car Park Drift” yenidən Bakıda keçiriləcək. Bu haqda bu gün, 5 iyun tarixində Bakuplus.az İticket.az-a istinadən xəbər verir.
Sözügedən turnirdə ən bacarıqlı 16 nəfər iştirakçı beynəlxalq münsiflər heyəti tərəfindən qiymətləndiriləcək. Maneələri ustalıqla keçən və ən yaxşı drift göstərən iştirakçı qalib olacaq.
Ən yaxşı drifter 25 ölkənin qatılacağı “Red Bull Car Park Drift”in Dünya Finalında Azərbaycanı təmsil etmək üçün Omana yola düşəcək.
2012-ci ildə Əbu-Dabidə ən uzun drift edərək adını Ginnesin Rekordlar Kitabına yazdıran dünya şöhrətli Abdo Feqali də yarışda iştirak edənlərə dəstək olmaq üçün növbəti dəfə Bakıya gələcək.
Tədbirin xüsusi qonağı populyar ifaçı Orxan Zeynallı olacaq.
Tədbir 9 iyun saat 14:00-da Dövlət Bayrağı Meydanında baş tutacaq. Biletin qiyməti 10 AZN təşkil edir.
