Bakıda fəvvarələr yay mövsümünə hazırdır? Bu haqda bu gün, 2 aprel tarixində Bakuplus.az Space News-a istinadən xəbər verir.
Bakıda martın 19-dan başlayaraq parklar və digər məkanlarda fəvvarələr işə salınıb. Lakin sakinlər fəvvarələrin günün isti vaxtı deyil, məhz sərin saatlarında – səhər və axşam işə salınmasından narazıdırlar.
“İnsanlar gəlir dincəlməyə, amma gəlib görürsən ki, su yoxdur. Axşam hamı evə gedəndən sonra fəvvarə işə salınır”, – deyə sakinlər şikayət edirlər.
Fəvvarələr İstismar İdarəsinin Rəisi Qəhrəman Məmmədovun sözlərinə görə, fəvvarələrin müəyyənləşdirilmiş iş qrafiki var.
“Fəvvarələrin işləməsi vaxtı səhər saat 07:30-10:00, günorta saat 13:00-15:00, axşam isə saat 17:00-dan 22:00-a qədərdir. Amma hal-hazırda fəvvarələr səhər saat 07:30-10:00-a qədər, axşam isə 17:00-22:00 aralığında işləyir. Havalar isinməyə başlayandan sonra əlavə olaraq saat 13:00-dan 15:00-a qədər də fəvvarələr işləyəcək”, – deyə Q.Məmmədov qeyd edib.
