Bakı küçələrində kanalizasiya qapaqları sürücülərə çətinlik yaradır. Bu haqda bu gün, 2 aprel tarixində Bakuplus.az ATV-yə istinadən xəbər verir.
Paytaxt yollarında harada gəldi quraşdırılan, yolun sağında, solunda bəzən düz ortasında, hətta 5-i bir yerdə olan lüklərə rast gəlinir. Sürücülər isə onlardan yayınmaq istəyərkən qəza şəraiti yaranır.
Avtomobil yollarında nizamsız şəkildə quraşdırılan, yer səthindən 10-15 sm aşağı olan kanalizasiya quyularına bir çarə varmı?
“Bu quyular bir sırada olmalıdır. Şahmat kimi düzüblər, maşın sürmək olmur”, – deyə sürücülər şikayət edirlər.
“Azərsu”dan məsələ ilə bağlı bildirilib ki, quyuların yerlərinin dəyişdirilməsi mümkünsüzdür.
“Bunlar hamısı qanuni işlənmiş, əvvəlcədən hesablanmış quyulardır. Əgər biz o lüklərin yerini dəyişsək, bu birləşən yerlər də dəyişilməlidir. Bu da şəhər sistemində qeyri-mümkündür. Əvvəldən layihələndirilmiş normalardır”, – deyə qurumun rəsmisi Camal Kərimov bildirib.
