Bakının Yasamal rayonunun sakinləri 3 ildir ki, eyni problemlə üzləşirlər - Vasif Əliyev küçəsini mütəmadi olaraq içməli su basır. Bu haqda 14 iyul tarixində Oxu.az məlumat verib.
Bu məsələ ilə bağlı sakinlər dəfələrlə yerli icra hakimiyyətinə, MKİS-ə və “Azərsu” ASC-yə müraciət ediblər.
“Digər qurumlar ümumiyyətlə reaksiya vermir, “Azərsu” əməkdaşları isə gəlib su borusuna bir çiv vurub gedirlər. İki gün su dayanır, sonra yenə həmin mənzərə görünür”, - deyə sakinlər şikayət edirlər.
Məsələ ilə bağlı açıqlama verən “Azərsu” ASC-nin mətbuat xidmətinin rəhbəri Anar Cəbrayıllı bildirib ki, ərazidəki su xətti mərhələli şəkildə təmir olunacaq.
"V.Əliyev küçəsində su borusunun 100 metrdən çox qəzalı hissəsi dəyişdirilib. Ona bitişik küçələrdə istismar müddəti bitmiş su xətləri də var. Bu səbəbdən qəzalar baş verir.
Yaxın zamanlarda Vasif Əliyev küçəsinin qalan hissəsində, eləcə də ətraf iki küçədə su xəttinin qəzalı hissəsinin dəyişdirilməsi üçün ərazi üzrə Su İdarəsi tərəfindən smeta hazırlanıb və “Azərsu” ASC-yə təqdim edilib. Layihə təsdiqlənən kimi sözügedən ərazidəki istismar müddəti bitmiş su xətləri dəyişdiriləcək”, - deyə Cəbrayıllı bildirib.
