Bakının Xətai rayonu, Gəncə prospektində binaya yeni lift quraşdırılıb. Sakinlərdən birinə həmin liftdən istifadə etməyə icazə verilmir. Bu haqda bu gün, 23 oktyabr tarixində Bakuplus.az ATV Xəbər-ə istinadən məlumat verir.
Bir neçə il öncə inşa edilən çoxmərtəbəli binanın hər blokunda 1 lift olub. Əlavə olaraq həm yük, həm sakinlər üçün əlavə lift istifadəyə verilib. Əlavə lift quraşdırılmamış sakinlər 800 manatdan pul yığıblar, sakinlərdən biri – Zəhra Seyidova isə ödəniş etmədiyinə görə onun liftdən istifadə etməsinə icazə verilmir.
Binanın sakinləri isə xanımdan şikayətçidirlər. Sakinlər bildirirlər ki, 2006-cı ildə inşa olunan binanın blokunda əvvəllər cəmi 1 lift olub. Bu da onlar üçün çətinlik yaradırdı. Hamısı bir yerə toplaşaraq ikici liftin quraşdırılması barədə razılığa gəliblər. Bunun üçün isə 800 manat pul yığıblar. Nəhayət, bir neçə ay əvvəl bloklarına 2-ci lift quraşdırılıb. Sakinlərdən biri isə ödəniş etməkdən imtina edib, buna görə də ona liftdən istifadə etməyə icazə verilməyib.
Məsələ ilə bağlı binaya nəzarət edən şəxs bildirib ki, binanı tikən şirkətin sahibi mənzilləri bir neçə şəxsə satdığına görə həbs edilib, sonradan isə dünyasını dəyişib. Bina yarımçıq qaldığından sakinlər birləşərək müştərək cəmiyyət yaradıblar, öz aralarında sədr də seçiblər. Bundan sonra binanın lift problemi həllini tapıb.
“Podradçı şirkət gəlib, sakinlərlə birgə liftin qiyməti müyyənləşib. Camaatın da mövqeyi belə oldu ki, kim pul veribsə, istifadə etsin. Bir blokda 90-a yaxın mənzil var, 90 dənə mənzilin hər birinin payına bölünüb”.
Orxan Qocayev əlavə edib ki, imkanı olmayan sakinə həmin məbləği hissə-hissə ödəmək üçün şərait də yaradılır. Buna razı olsa, onun liftdən istifadə etməsinə icazə veriləcək. Əgər, ümumiyyətlə, ödənişdən imtina etsə, cəmiyyətin qərarı qüvvədə qalacaq.
