Bakıda 4 uşaq anası övladlarını parkda qoyub sevgilisi ilə yayınıb. Bu haqda bu gün, 3 iyul tarixində Bakuplus.az Azərbaycan Uşaqlar Birliyinin sədri Kəmalə Ağazadəyə istinadən məlumat verir.
Hadisənin 3 gün əvvəl baş verdiyi deyilir. Uşaqların təxminən 14, 5, 4 yaşları var, ən balacası isə 5-6 aylıq körpədir. Böyük qızın sözlərinə görə, ana onları parkda qoyaraq kirayə ev axtarmaq bəhanəsi ilə sevgilisi ilə ərazidən uzaqlaşıb.
Böyük qız bildirir ki, balaca olanda Mingəçevirdə yaşayıblar. Anasının adı Günay, nənəsinin adı Nəcibədir. Böyük qızın adı Günəş, atasının adı isə Asim olmalıdır. Heç bir sənədləri yoxdur. Ehtimal edilir ki, bir müddət Xırdalanda da qalıblar.
Uşaqlar sığınacağa yerləşdiriliblər. Onlar A.F.Qarayev adına uşaq xəstəxanasında tibbi müayinədən keçiriliblər.
DİN-dən verilən məlumata görə, qadın müəyyən olunaraq polis bölməsinə dəvət olunub. Onun övladlarından imtina etməsinin səbəbləri araşdırılır.
