Bakıda qəzalı vəziyyətdə olan binanın sakinləri təhlükə ilə üzləşib. Bu haqda BakuPlus.az Report-a istinadən bu gün, 17 may tarixində xəbər verir.
Xətai rayonu, Araz Novruzov 34 ünvanında yerləşən yaşayış binası uçmaq təhlükəsi var.
Qamışdan inşa edilən 2 mərtəbəli, 2 bloklu binada, təxminən, 12 ailə yaşayır. Belə ki, binanın bir hissəsi uçub, daşlar və qamışlar yerə tökülüb.
Təhlükə riskinə görə, sakinlərin əksəriyyəti artıq evlərini tərk edib.
Bina sakini Mələkxanım Babayeva bildirib ki, külək əsən kimi mənzilin tavanında ciddi problem yaranır, elektrik enerjisi kəsilir və sakinlər günlərlə işıqsız qalırlar. O, aidiyyəti qurumlara dəfələrlə müraciət etdiklərini, lakin heç bir nəticənin olmadığını bildirib.
Məsələ ilə bağlı Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov açıqlamasında deyib ki, həmin ünvan daxil olmaqla qəzalı binaların inventarizasiyası keçirilib:
“Yaxın zamanlarda qəzalı və kəskin qəzalı binalarla bağlı qərar veriləcək, biz də üzərimizə düşən öhdəlikləri yerinə yetirəcəyik. Qəzalı vəziyyətdə olan binalar tərəfimizdən nəzarətdə saxlanılır. Kəskin hava şəraiti ilə əlaqədar əməkdaşlarımız sözügedən ərazidə olub, nəzarət edirlər".
