Ölkədə nəqliyyat vasitələrinin parklanmasına görə ödənişlərin yığımı nağdsız qaydada mobil tədbiq və SMS vasitəsilə həyata keçirilir. Bu prosesə ötən ilin avqust ayından başlanılıb. Buna baxmayaraq, paytaxtın bəzi yerlərində hələ də qanunsuz parklanma yerlərinə rast gəlmək mümkündür.
Elə Nərimanov rayonunda “Şəki” dairəsi kimi tanınan ərazi yaxınlığında qanunsuz dayanacaq fəaliyyət göstərir. Burada yaşayan sakinlər iddia edirlər ki, “parkovşik”lər digər nəqliyyat vasitələrindən müəyyən məbləğ alaraq onların avtomobillərini gün ərzində burada parklayırlar və bu da burada yaşayan sakinlərin öz avtomobillərini saxlamalarına maneə yaradır, eyni zamanda gün ərzində rahat hərəkətə mane olur. İşdən sonra evə qayıdan sakinlər isə öz maşınları üçün yer tapa bilmədiklərinə görə avtomobilləri digər yerlərdə saxlamağa məcbur qalırlar.
Paytaxtın digər ərazilərində də oxşar vəziyyət müşahidə edilir. Sakinlər deyirlər ki, burada da müəyyən vəsait hesabına avtomobillər saatlarla saxlanılır.
Aidiyyəti qurumlar isə sürücüləri həmin parklanma yerlərindən istifadə etməməyə çağırır.
“Küçə parklanma yerlərindən istifadəyə görə sürücülərdən nağd şəkildə hər hansı bir ödəniş tələb oluna bilməz. Sürücülərə qanunsuz ödəniş etməməyi tövsiyə edirik. Sürücülərdən parklanma adı ilə nağd pul tələb edilməsi tam qanunsuzdur”, – Azərbaycan Yerüstü Nəqliyyat Agentliyinin (AYNA) mətbuat katibi Tural Orucov deyib.
Bu halları təşkil edənlər, həmin xidmətlə bağlı ödəniş tələb edən şəxsləri qanunvericiliklə müəyyən cəza gözləyir.
“Dayanma-durma və parklanma qaydasının tənzimlənməsi məqsədilə neqativ hallar tərəfimizdən aradan qaldırılır. Hərəkətin intensiv olduğu küçə və prospektlərdə, piyada səkilərində parklanma ilə bağlı sistemli mübarizə və profilaktik tədbirlər həyata keçirilir. Qeyd eləmək lazımdır ki, inzibati xətalar məcəlləsinin müvafiq maddəsinə əsasən, qanunsuz parklanma işini təşkil edən şəxslər barəsində inzibati tənbeh tədbiri və eləcə də cərimələr tədbiq edilir”, – deyə Daxili İşlər Nazirliyinin əməkdaşı Elbrus İbrahimov bildirib.
Mövcud məbləğ 80 AZN təşkil edir. Lakin qanun pozuntusunu edənlər 2000 manatadək cərimə olunacaqlar. Bu, İnzibati Xətalar Məcəlləsinə təklif olunan dəyişiklikdə öz əksini tapıb. Layihəyə əsasən, fiziki şəxslər 100 manatdan 200 manatadək məbləğdə, vəzifəli şəxslər 300 manatdan 500 manatadək məbləğdə cərimələnəcəklər. Bununla yanaşı, inzibati həbs də tədbiq oluna bilər.
