Bakıda 70-dən çox yaşı olan yataqxana binası yavaş-yavaş dağılır. Bu haqda 29 noyabr tarixində Bakuplus.az ATV-yə istinadən xəbər verir.
Nəsimi rayonu, Mərdan Mərdanov, 119 ünvanında yerləşən keçmiş məcburi köçkünlərin müvəqqəti məskunlaşdığı yataqxana binası həm qəzalıdır, həm də zirzəmiyə dolan kanalizasiya suları antisanitar vəziyyət yaradıb. Burada təxminən 160 ailə yaşayır. Sakinlər bildirirlər ki, dəfələrlə problemləri ilə bağlı aidiyyəti qurumlara şikayət etsələr də, heç bir nəticə əldə etməyiblər.
Sakinlər deyirlər ki, binada rütubət olduğundan onlar tez-tez xəstələnirlər. Nəmişlik o qədər çoxdur ki, binanın müxtəlif mərtəbələrində kol-koslar, hətta 3-cü mərtəbədə bar verən əncil ağacı da yetişib.
Problemlə bağlı Nəsimi rayonu Mənzil Kommunal Təsərrüfatı Birliyindən bildirilib ki, keçmiş məcburi köçkünlərin yaşadığı yataqxana onların balansında deyil, lakin binanın vəziyyətindən xəbərdardırlar. Orada yaşayan sakinlər yalnız işğaldan azad olunan ərazilərə köçürüləcək. Bu zamana qədər isə yataqxanada bəzi təmizlik işlərinin aparılması mümkündür.
Adıçəkilən ünvanda yerləşən yataqxana əvvəllər tikiş fabriki kimi fəaliyyət göstərib. 1993-cü ildən isə burada Ağdam sakinləri məskunlaşıblar.
[URIS id=80979]
