Bakıda sərnişinlərin həyatını təhlükəyə atan 22 saylı avtobusun sürücüsü ilə bağlı açıqlama verilib. Bu haqda bu gün, 4 iyul tarixində Bakuplus.az Oxu.az-a istinadən məlumat verir.
Sürücünün mobil telefonla danışarkən nəqliyyat vasitəsini idarə etməsi sərnişinlərin narazılığına səbəb olub. Məlumatı yayan vətəndaş qeyd edib ki, həmin şəxs yolun Bakıxanov qəsəbəsindən “8-ci kilometr” bazarına qədər hissəsində telefonla danışıb.
"Xanım sərnişinlərdən biri ona sükan arxasında telefonla danışmağın qadağan olunduğunu desə də, sürücü sərnişinə qarşı kobudluq edib. Sürücülərin əksəriyyəti sərnişinlərlə mədəniyyətsiz, tərbiyəsizcəsinə davranır. Onun ani diqqətsizliyindən bədbəxt hadisə baş versə, sərnişinlərin başına gələcəklərə görə kim məsuliyyət daşıyır? Sürücü ona irad bildirən sərnişini maşından düşürdü", – deyə şikayətçi bildirib.
Azərbaycan Yerüstü Nəqliyyat Agentliyindən (AYNA) bildirilib ki, yayılan görüntülərlə bağlı araşdırma aparılıb.
"22 nömrəli marşrut üzrə fəaliyyət göstərən avtobusun sürücüsünün izahatı alınıb. Daşıyıcı tərəfindən onun barəsində inzibati tənbeh tədbiri görülüb. Digər sürücülərin də təlimatlandırılması barədə AYNA tərəfindən daşıyıcıya tapşırıq verilib", – deyə agentlikdən əlavə edilib.
