Bakının Səbail rayonunda yerləşən 219 saylı evdə təhsil tam orta məktəbinin müəllimləri şagird azlığından şikayətçidirlər. Onlar iddia edirlər ki, 2 ildir məktəbə şagird qəbulu yoxdur. Həmçinin məktəbin bağlanacağı da bildirilir. Bu haqda bu gün, 26 oktyabr tarixində Bakuplus.az ATV Xəbər-ə istinadən məlumat verir.
Hazırda məktəbdə sağlamlığı məhdud olan 180 şagird təhsil alır. Məktəbin 142 müəllimi var. Lakin onlar işsiz qalacaqlarından narahatdırlar.
Məsələyə Bakı Şəhəri üzrə Təhsil İdarəsindən aydınlıq gətirilib. İdarədən bildirilib ki, sağlamlıq imkanları məhdud uşaqlar üçün təhsildə əlçatanlığın, səmərəliliyin və bərabərliyin təmin edilməsi prioritet məsələdir.
“Bu baxımdan 219 nömrəli evdə təhsil məktəbinin şagirdlərin təhsilinin qanunauyğun şəkildə ərazi üzrə ümumi təhsil müəssisələri vasitəsilə təşkili məqsədəuyğundur”, – deyə idarədən bildirilib.
Həmçinin bildirilib ki, hazırda bu məktəb fəaliyyətini davam etdirir, lakin uşaqların sosial adaptasiyası məqsədilə bütün şagirdlər mərhələli şəkildə yaşadıqları yer üzrə ümumtəhsil məktəblərinə köçürüləcək və təhsillərini evdə davam etdirəcəklər.
İdarədən onu da qeyd ediblər ki, əgər sağlamlıq imkanları imkan verirsə, uşaqlar inklüziv təhsilə cəlb oluna bilərlər.
Müəllimlərə gəlincə dərs saatları azalan müəllimlərə digər məktəblərdə uyğun dərs saatlarının verilməsi təmin olunur.
