Paytaxtın Nəsimi rayonu, Həzi Aslanov küçəsi ilə Əlövsət Quliyev küçəsinin kəsişməsində yerləşən qəzalı vəziyyətdə olan bina sakinlərin həyatı üçün təhlükəyə çevrilib. Bu haqda bu gün, 12 dekabr tarixində Bakuplus.az AzTV-yə istinadən məlumat verir.
Ötən əsrin əvvəllərində inşa edilən bu bina istismar müddətini başa vurduğuna görə deyil, başqa bir hadisəyə görə qəzalı vəziyyətə düşüb və o vaxtdan düz 25 il ötüb. Bu müddət ərzində binada nə söküntü, nə də təmir-bərpa işləri aparılıb.
1997-ci ildə bitişik binada yanğın baş verib. Yanğın zamanı əksər evlər qəzalı vəziyyətdə olduğundan sakinlərin bir hissəsi buradan köçüb. Bir neçə ailə qalıb ki, hal-hazırda onların yaşadıqları evlər qəzalı vəziyyətdədir.
Sakinlərin sözlərinə görə, 25 il əvvəl bu binada 20 ailə yaşayıb. Yanğından sonra sakinlərin əksəriyyəti bu binanı tərk edərək kirayəyə və ya başqa evlərə köçüb. 3 ailə isə imkansızlıqdan qəzalı vəziyyətdə olan bu binada yaşayır.
Qəzalı bina ilə bağlı Nəsimi Rayon İcra Hakimiyyətindən(RİH) bildirilib ki, bu binanın vəziyyətindən xəbərləri var.
Nəsimi RİH-nin memarı Ələsgər Rüstəmov: “Qəzalı vəziyyətdə olan binalar haqqında monitorinqlər keçirilir. Nəticədə ya söküntü işləri aparılaraq müasir binalar tikilməlidir, ya da qəzalı binalar yeni binanın tikintisi üçün yararlı olmayan yerlərdədirsə, müvafiq təmir-bərpa işləri aparılmalıdır”.
Memar əlavə etdi ki, ötən əsrin əvvəllərində inşa edilən bu binanın taleyi haqqında yaxın vaxtlarda qərar veriləcək.
