Bakıda saxta məhsulların hazırlanması faktı aşkar edilib. Bu haqda bu gün, 19 aprel tarixində Bakuplus.az Dövlət Vergi Xidmətinə istinadən xəbər verir.
Keçirilən yoxlama zamanı Nizami rayonu, Keşlə qəsəbəsində yerləşən ət kombinatının həyətindəki sexlərdə saxta məhsulların hazırlanması faktları aşkar edilib.
Belə ki, müxtəlif ticarət nişanlarını və onların qablaşdırmalarını saxtalaşdırmaqla naməlum tərkibli kimyəvi və yuyucu məişət vasitələrinin, aksiz markası ilə markalanmadan və ya saxta aksiz markalarından istifadə etməklə spirtli içkilərin istehsalı, saxlanılması və satışının həyata keçirilməsi məlum olub.
Qanunsuz istehsal obyektində 6600-dən çox “Domestos” markalı hazır məhsul, 960 ədəd “İpek” və 650 ədəd “Head and Shoulders” markalı şampunlar, 240 ədəd “Luxury Shave Cream”, 970 ədəd “Gold power” ticarət adlı hazır məhsullar, 2630 ədəd “Fairy” hazır qabyuyan məhsulu, 200 “Surescents” havatəmizləyici, habelə 31.700-dən çox “Domestos”, “Perwoll”, “Prill”, “ACB”, “Fairy”, “İpek”, “Head and Shoulders” etiketli və ya etiketsiz boş qablar və xammal tapılıb.
Həmçinin sexlərdən 29.500 ədəd şüşə butulka, 74 ədəd saxta aksizli hazır məhsul, 1100 ədəd etiketsiz yarımfabrikat araq məhsulu, 1900 litr araq xammalı, 3700 ədəd saxta aksiz markası, külli miqdarda müxtəlif markalara məxsus etiketlər, qapaqlar, həmçinin 600 litr xlor xammalı aşkar edilib.
Sözügedən mallar antisanitariya şəraitində hazırlanaraq kiçik mağazalara və bölgələrdəki obyektlərə satılması nəzərdə tutulurdu.
