Zığ-Hövsan yolunda təmir-tikinti işləri yenidən başlayıb. Bu haqda BakuPlus.az APA-ya istinadən xəbər verir.
2015-ci ilin oktyabr ayında təmirə bağlanan Zığ dairəsi-Hövsan-Türkan avtomobil yolunda təmir işlərinə yenidən start verilib. Əraziyə xeyli sayda canlı qüvvə və texnika cəlb olunub.
Yeni yolun 4 hərəkət zolaqlı olacağı nəzərdə tutulub.
Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirdi ki, hazırda yolda tamamlanma işləri aparılır:
“İşıq dirəklərinin quraşdırılması, səkilərin və yolayrıcının ayrıca inşası istiqamətində də işlər yekunlaşmaq üzrədir. Sonuncu mərhələdə yola 3-cü lay asfalt-beton örtüyünün döşənməsi icra olunacaq. Bununla da yol tam olaraq vətəndaşların istifadəsinə veriləcək. Yolun təqribən 3-4 kilometr hissəsində tam olaraq qeyd etdiyim işlərin icrası aparılaraq yekunlaşdırılıb. Ərazi boyu piyada keçidləri də inşa olunub”.
Yolun təmirinə “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na əsasən başlanılıb və ümumilikdə yolun 130 min kv.m sahəsinin 3 qat olmaqla asfaltlanması planlaşdırılıb.
[caption id="attachment_38527" align="alignnone" width="800"]
Foto Apa.az saytı[/caption]
