Son iki həftə ərzində liftin qırılması nəticəsində 12 nəfər xəsarət alıb. Faktlar Xətai rayonu, Xudu Məmmədov küçəsində və Nərimanov rayonu, A.Nemətulla küçəsində yerləşən binalarda qeydə alınıb. Nasaz liftlər yeni tikili binaların liftləri olub. Bu haqda bu gün, 1 iyul tarixində Bakuplus.az Xəzər Xəbər-ə istinadən məlumat verir.
Əmlak eksperti Elnur Fərzəliyevin sözlərinə görə, buna səbəb ondan ibarətdir ki, yeni tikili binalar inşa olunub bitdikdən sonra vətəndaşlar öz mənzillərini təmir edərkən daha çox tikinti materiallarını vətəndaşlar üçün ayrılmış liftlər vasitəsilə mənzillərə daşıyırlar ki, bu da liftləri daha qısa müddətdə sıradan çıxarır.
Fərzəliyev onu da qeyd edib ki, əksər hallarda tikinti şirkətlərinin böyük hissəsi liftlərə xidmət edən şirkətlərlə müqavilə bağlamır. Nəticədə liftlərin vəziyyəti vaxtında yoxlanılmır ki, bu da faciəvi hallara gətirib çıxarır.
