Paytaxt ərazisindəki metro stansiyalarının yaxınlığında taksilər avtobuslara maneə yaradır. Bu haqda bu gün, 29 mart tarixində Bakuplus.az ATV News-a istinadən xəbər verir.
Avtobuslar üçün ayrılan xüsusi zolaqlara avtomobillərin girişi qadağan olsa da, sürücülərin çoxu buna məhəl qoymur. “Əhmədli”, “Qara Qarayev”, həmçinin “Neftçilər” və digər metro stansiyalarının ətrafında taksi sürücüləri avtobus dayanacaqlarını zəbt edirlər. Bu da sərnişindaşımaların dayanacağa yaxınlaşmasında problemlər yaradır.
“Saat 6-da bura gələndə yer tapmaq mümkün olmur. Taksi sürücüləri gəlib necə gəldi avtomobilləri saxlayırlar. Məcbur oluruq dayanacaqdan kənar saxlayaq və sərnişinləri yolun ortasında düşürdək”, – deyə avtobus sürücüləri şikəyət edirlər.
Dövlət Yol Polisinin inspektoru Mirsamir Abbaszadə bildirib ki, ərazidə qayda pozuntusu aşkarlananda həmin nəqliyyat vasitələrinin sürücülərinə protokol tərtib olunur.
Ekspertlər isə nəzarətin güclü olmadığını vurğulayırlar:
“Qayda pozan sürücülər, demək olar ki, cərimələnmirlər. 40 manatdır, ona həftədə bir dəfə tərtib edilsə, o ömür boyu ora yaxın düşməyəcək. Deməli, cərimələnmirlər”, – deyə ekspert Ərşad Hüseynov qeyd edib.
