Paytaxtın Nərimanov rayonunda yerləşən 45 nömrəli tam orta məktəbin görmə əngəlli müəllimi şagirdlərin sevimlisidir. Bu haqda bu gün, 29 sentyabr tarixində Bakuplus.az Xəzər Xəbərə istinadən məlumat verir.
Ozal müəllim təhsil ocağında tarix fəndini tədris edir. O, görmə əngəllidir və materialları audioformatda dinləyir, şagirdlərini görməsə də, hər birini çox yaxşı tanıyır.
“Müəllimin 7 gözü olsa da, şagird köçürtmək istəyirsə köçürdəcək. Mənim dərsimdə şagirdlər kitabdan oxuya bilməz. Misal üçün, əgər şagird 3-cü mövzuya yaxşı cavab verdisə, mən dərhal ona 1-ci mövzudan suallar verirəm. Əgər burada o, yaxşı cavab verə bilmirsə, hər şey mənim üçün aydın olur”, - deyə müəllim bildirir.
Ozal müəllim həm də abituriyent və müəllimləri hazırlaşdırır. O, 30-dan artıq abituriyenti və 20 müəllimi hazırlaşdırır.
Onun yol yoldaşları isə elə şagirdlərin özüdür. Ozal müəllimə yerdəyişməsi üçün elə öz şagirdləri köməklik edir. Ona evdən işə getməyə, məktəbdə hərəkət etməyə şagirdləri kömək edirlər.
Ozal müəllim 562 balla Pedaqoji Universitetə qəbul olub, daha sonra isə həmin təhsil müəssisəsində magistr təhsili alıb. O, bu il müəllimlərin sertifikasiya imtahanında 100-dən 97,5 bal toplayıb.
