Bakıda məşhurlarla görüş günləri keçiriləcək. Tədbir Beynəlxalq Kitab sərgisi çərçivəsində 6-10 oktyabr tarixlərində təşkil olunacaq.
Sərginin keçiriləcəyi 5 gün ərzində iştirakçıları və ziyarətçiləri əlavə tədbirlərdən ibarət proqramlar gözləyir. Məşhur azərbaycanlı və xarici yazarlar sərginin müxtəlif günlərində “günün qonaqları” olacaqlar.
Qonaqlar arasında Çingiz Abdullayev, Bəhram Bağırzadə, Elxan Elatlı, Elçin Əliyev, Nail Əlizadə, Gülseren Buğdayıcıoğlu, Toğrul Mehti Niyazi, Sinan Canan və digərləri var.
6 oktyabr saat 14:00-da Çingiz Abdullayevlə görüş təşkil olunacaq. Eyni gündə saat 16:30-da türk yazıçısı Sinan Yağmur da kitabının təqdimatında öz oxucuları ilə görüşəcək. Sərginin ilk günündə "Bakılı oğlanlar" KVN komandasının əfsanəvi üzvü, aktyor, publisist, əməkdar artist Bəhram Bağırzadə də iştirak edəcək.
Oktyabrın 7-də saat 14:00-da “günün qonağı” Elxan Elatlı olacaq. Görüşdə kitab təqdimatı da keçiriləcək. Daha sonra yazıçının avtoqraf saatı baş tutacaq. Həmin gün saat 13:00-da tədqiqatçı və yazıçı Sinan Canan ilə görüş keçiriləcək.
Gülseren Buğdayıcıoğlu ilə görüşmək istəyənlər 9 oktyabr tarixində saat 13:00-da Bakı Ekspo mərkəzinə gələ bilər.
9 oktyabr saat 15:00-da yazıçılardan əlavə Türkiyənin məşhur aktyorlarında olan Ercan Kesal ("Çukur" serialının baş qəhrəmanı İdris Koçovalı) ilə görüş saatı keçiriləcək.
Sərgi çərçivəsində tarixçi Fuad Axundovun təqdimatında "Cənubi Qafqaz şəhərlərinin tarixi ənənələri" mühazirəsi baş tutacaq.
Sərgi və tədbirlərdə iştirak üçün qeydiyyat keçmək zəruridir.
Bundan öncə, Bakıda sabahdan 7-ci Bakı Beynəlxalq Kitab Sərgisinin fəaliyyətə başlayacağı barədə məlumat vermişdik.
