Paytaxtın Nizami rayonu, Cəmşid Naxçıvanski küçəsininə yol kənarında park edilən nəqliyyat vasitələri dönmək istəyən sürücülərə çətin anlar yaşadır. Günün pik saatlarında isə vəziyyət daha dözülməz olur. Bu haqda bu gün, 27 dekabr tarixində Bakuplus.az Xəzər Xəbər-ə istinadən məlumat verir.
Naxçıvanski küçəsi ilə Natiq Əhmədov küçəsinin kəsişməsində düzünə hərəkət edən sürücülər nişanın tələblərinə uyğun olaraq sağdan gələn nəqliyyat vasitələrinə yol verməlidirlər, ancaq sağ tərəfdən yolun hər 2 hissəsi parklanma ilə zəbt olunduğu üçün sürücülərin görmə məsafəsi daralır, nəticədə qəza şəraiti yaranır.
Bənzər problem təkcə bu ərazilərdə yaşanmır.
Nəqliyyat məsələləri üzrə ekspert Ərşad Hüseynov bildirir ki, yolayrıcında hərəkət hissələrinin kəsişməsinə 5 metrdən yaxın məsafədə dayanma və durma qadağandır. Həmin yerlərin parklanma kimi fəaliyyət göstərməsi isə yolverilməzdir. Ekspert deyir ki, belə ərazilər nəzarətə götürülməli, yerində təhlillər aparılmalı, sürücünün hərəkətinə mane olan bütün səbəblər aradan qaldırılmalıdır.
Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucov bildirdi ki, sözügedən ərazidə nəqliyyatın hərəkətinə daha çox qanunsuz parklanma yerləri mane olur.
“Nizami rayonunun Cəmşid Naxçıvanski və Natiq Əhmədov küçələrinin kəsişməsində xeyli sayda qanunsuz parklanma halları mövcuddur. Eyni zamanda yük avtomobilləri də həmin ərazidə park edilir ki, bu da qanun tələblərinə ziddir. Digər hərəkət iştirakçıları üçün görmə məhdudiyyəti yaranır. O da qeyd olunur ki, parklanma yerləri təşkil edilən zaman bütün yol hərəkəti iştirakçıları üçün əlverişli mühitin yaradılması şərt kimi götürülür. Qeyd edilən ünvana gəlincə AYNA-nın mütəxəssisləri tərəfindən əraziyə bir daha baxış keçiriləcək və təhlükəsizliyə təhdid yaranarsa, bütün zəruri tədbirlər görüləcək”, – AYNA-nın rəsmisi əlavə edib.
Qurum nümayəndəsi qeyd edib ki, Nizami rayonunda artıq ödənişli parklanma yerlərinin təşkilinə başlanılıb və bu da sözügedən problemin həllinə töhfə vermiş olacaq.
